Por fin, poñemos a andar a nosa horta!

Día Mundial das Abellas

O 20 de maio conmemórase o Día Mundial das Abellas, e na escola de Figueiró non podíamos deixar pasar esta data sen falar da importancia deste insecto para a vida no planeta. 

Como vedes, xa temos bastante clara a anatomía das abellas  (cabeza, tórax, abdome, patas, ás, antenas...) despois de levar dúas semanas realizando propostas relacionadas con este insecto.

Aprendemos que a maioría das froitas e verduras obtémolas grazas á función das abellas como polinizadores importantísimos. Debatemos sobre qué pasaría se non houbese flores, nin froitas, nin plantas, qué nos pasaría a nós ou a outros animais. Tamén falamos sobre como debemos comportarnos se nos topamos con elas ou sobre  o perxudicial que resulta para elas o uso de pesticidas. Pouco a pouco imos concienciándonos sobre a necesidade de coidar o noso planeta!

Día das Letras Galegas

O pasado xoves día 16 celebramos na escola da Aurora o Día das Letras Galegas. Xuntámonos todas as escolas do CRA e tamén asistiron numerosas familias.

Comezamos bailando unha canción para coller forzas e acto seguido realizamos diferentes xogos tradicionais: chapas, mariola, rá...

Posteriormente, puidemos desfrutar da  instalación "Curemos a nosa lingua", elaborada pola totalidade de alumn@s e profes do CRA, composta por multitude de vendas que, de xeito simbólico, pretenden "curar" a lingua galega. En cada unha delas estaba cosida a man, unha palabra significativa da nosa lingua: aloumiño, bico, aperta, arrolo... Encantounos vela por dentro e escoitar o son dos axóuxeres cando moviamos as vendas. 

Ó rematar merendamos e descansamos un pouquiño, pois aínda nos quedaba pendente a carreira solidaria de "Gotas para Níger". Íamos moi motivad@s e demos un montón de voltas!  Aquí vos quedan algunhas fotiños que resumen esta enriquecedora xornada. 

FELIZ DÍA DAS LETRAS GALEGAS!

DÍA DA FAMILIA

Hoxe na escola de Figueiró conmemoramos o Día da Familia, e foron moitos/as os familiares que acudiron á aula a pasar un ratiño con nós.

Realizamos diferentes xogos de mesa, puzzles de xeito cooperativo e tamén un obradoiro de "slime". Nen@s e adultos, estivemos moi concentrados e entretidos durante máis dunha hora.

Ó rematar saímos ó patio a merendar. Tiñamos gran variedade de cousas: tortilla, croquetas, biscoito... E despois a xogar!

Antes de marchar, non nos podíamos esquecer de levar para a casa as obras de arte que os nen@s con tanto cariño elaboraron. Agora toca decidir onde colgalas!

Moitísimas grazas a todas as familias pola vosa implicación e colaboración na escola; é algo importantísimo para os vosos nen@s, e tamén para min como mestra.

FELIZ DÍA DA FAMILIA!

 

"Estás na auga"

Na xornada de onte fixemos unha saída escolar a Estás, grazas ao programa "Voz Natura". Alí aprendimos moitas cousas sobre a auga, coñecemos a uns anfibios chamados rabilongas, que só viven en augas puras, bebemos auga fresca dun manantial, xogamos e experimentamos con ela.

Ó rematar axudamos a reforestar o monte plantando carballos, de xeito cooperativo. Aquí vos deixamos algunhas fotiños.

Investigamos sobre AS ABELLAS

Con motivo do inicio da primavera, e dada a curiosidade que espertan estes insectos nos nen@s cada vez que os vemos no patio, comezamos unha pequena investigación sobre AS ABELLAS ó longo deste trimestre. Pouco a pouco iremos aprendendo cousiñas relacionadas coa súa anatomía, alimentación, forma de vida... e sobre todo, a súa importancia para o sostemento da vida no noso planeta. Como xa sabedes, toda colaboración e aportación pola vosa parte, será ben recibida. Mirade todo o que andivemos a facer polo momento!

Contacontos na escola

Fai unha semaniña a mamá de Alejandro veu á escola para contarnos un conto moi divertido: "Nunca hagas cosquillas a un tigre". Tras seleccionar todos os animais que eran necesarios para poder contalo como se merece, Alejandro ofreceulle a súa axuda e tod@s puidemos desfrutar deste fantástico conto que nos contaron entre os dous. Moitas grazas a Almudena, por vir pasar este ratiño con nós!